لأنهم شركاء معنا في هذا الوطن

كنت أتصفح بعض صفحات جوجل باحثاً عن خبر ما فوجدت تلك التدوينة التى كنت قد كتبتها منذ عدة أشهر وربما أقتربت من عام  ولكن هذه التدوينة يربطني بها ذكريات مبهجة وسعيدة فغير أن هذه التدوينة قد فازت في مسابقة مدونون ضد التغيرات المناخية بالمركز الأول إلا أنني قد فوزت وقتها بمجموعة من الإصدقاء أفخر بصداقتهم وكانوا بالنسبة لي أغلي من أى جائزة 

كما أنني أستشعرت بمدي أهميتها ليست في موضوعها - وهو موضوع بالغ الأهمية - ولكن أهميتها في هذا التوقيت يرجع إلي سياق الحديث الوارد بداخلها فهي تتطرق إلي حديث بين أحد البسطاء وبين أحد الأشخاص - قد تكون أنت من يتحدث ولكن أنظر كيف حاول هذا الشخص جاهداً أن تصل رسالتة بطريقة مبسطة حتي يفهما عم عويس- تحاكي طريقة تعاملنا مع بعض البسطاء وطريقة الخطاب الموجهة من النخب إلي عامة الشعب ومدي إتساع الفجوة بين الشعب وبين الساسة 

فجمهور الشعب المصري يعيش تحت خط الفقر لايفكر في قضية الدستور أولاً أم ثانياً بينما يفكر في ماهي المكتسبات المادية التى سوف تعود علية جراء ثورتنا العظيمة -ولا يمكن أن نعيب علي ِأهلنا  البسطاء - أن هؤلاء الفقراء والبسطاء هم أمانة في أعناقنا وتجاهل مطالبهم والألتفاف عليها هو خيانة للأمانة فلنفكر ملياً في طريقة تعاملنا معهم ولنحاول أن نبسط لهم القضايا حتي يكونوا شركاء معناً في حلها لأنهم شركاء معنا في هذا الوطن

دة بقا مش عويس

 

  دة كلام تليفزيونات يا أستاذ

هي الدلتا حتغرق ؟؟؟؟

لا الدلتا مش حتغرق

هكذا بدأ الحديث بين أستاذ محمد وعويس  حول غرق الدلتا

أستاذ محمد : بص ياسيدي أنا حفهمك الموضوع معدلات درجات الحرارة زاد مما يؤدى إلي ذوبان الجليد في القطب الشمالي وبتالي زيادة منسوب مياة البحار الذي بدوره سوف يؤدي إلي غرق بعض المناطق في الدلتا

عويس : يا أستاذ أنت عمال تتكلم زي " بتوع التلفزيون "  لية تقول معدلات ومنسوب وذوبان الجليد والقطب الشمالي ايه الحجات الغريبة دي أنا مش فاهم حاجة خالص

أستاذ محمد : شوف ياعويس أنا حشرحلك الموضوع بمنتهي السهولة بس يارب تفهم منا عارف انك زكى خالص الأرض إلى احنا عايشين فيها دى عبارة عن مجموعة من البحار والمحيطات زى بحر إسكندرية كدة وبحر مرسي مطروح والحجات الحلوة إلى أنت بتحب تبلبط فيها دى

عويس : ايوة حلو أووي بحر مرسى مطروح دة انا بحب أتفرج علية فى" التلفزيون" بس عمرى ما روحت هناك 
 
أستاذ محمد: الحمد لله انك فهمت حاجة في بقا بحار ومحيطات زى بحر إسكندرية دة بس عبارة عن جليد " ثلج يعنى " بيسموها المنطقة القطبية 
 
عويس : ياحلاوة ياولاد يعني المية فيها ساقعة كدة وحلوة 
 
أستاذ محمد : لا ثلج زى إلى أنت بتحطة فى " فريزر الثلاجة " 
 
عويس : ايوه ايوه عارفة أنت مفكر أنى أهبل 
 
استاذ محمد : قولى بقا ياعويس لو أنت طلعت الثلج من الثلاجة أية إلى يحصل 
 
عويس : بعد شوية يبقا مية 
 
أستاذ محمد : جدع ياعويس هو دة بقا إلى بيحصل فى المحيطات والبحار إلى أنا حكيتلك عليها 
 
عويس : إزى يعنى 
 
أستاذ محمد : أنت  مش كونت بتقولى أن الدنيا حر أوووى السنة دى 
 
عويس : أيوة والله دنا حتى كونت بفكر أشتري مروحة كمان أحطها فى الاوضة و كان شيخ الجامع بيقول أن دة غضب من ربنا علشان ذنوبنا كتير

أستاذ محمد : شيخ الجامع قال كده 
 
عويس : أيوه والله علشان كدة أنا مشترتش مروحة وأعت أدعي ربنا أنه يخفف غضبة والحر يخف شوية 
 
أستاذ محمد : جدع ياعويس لما الدنيا بقا تبقى حر قوى كدة الجليد إلى فى البحار والمحيطات دى بقا يذوب ويبقى ميه 
 
عويس : طيب كويس مش هما بيقولوا أن الدول بتاعة أفريقيا " السود دول " إلى أنا مش عارف أسمهم مش عاوزين يدونا ميه اهوه ربنا بعتلنا ميه من كل مكان 
 
أستاذ محمد : ناس سود مين ومية أيه أسكت ياعويس دة مش كويس خالص

عويس : لية بس يا أستاذ 
 
أستاذ محمد : لأن الميه دي لما بتزيد أكتر من الازم مستوي سطح البحر بيزيد ولما مستوي سطح البحر يزيد في مناطق كتير حتغرق 
 
عويس : مستوي سطح البحر يعني أيه دة مش فاهم 
 
أستاذ محمد : لو أنت ياعويس تجيب " إزازة ميه "وتفضيها في " كباية " لما الكوباية بتتملي أيه إلى بيحصل 
 
عويس : الميه بتقع من الكوباية علي الأرض 
 
أستاذ محمد : جدع ياعويس هوة دة إلى حيحصل بالظبط الثلج لما يذوب حينزل فى البحر ولما ينزل فى البحر البحر يزيد فيدخل علي الأرض وبكده مناطق كتير حتغرق

عويس : طيب وأيه الحل 
 
أستاذ محمد : الحل إننا نشوف السبب إلى بيخلى الدنيا بتبقى حر ومنعملهوش

عويس : يعنى نبطل ذنوب ونعد ندعي ربنا 
 
أستاذ محمد : وهو أيه علاقة الذنوب بالكلام إلى أنا بقولة 
 
عويس : مهو الشيخ صديق قال كده 
 
أستاذ محمد : مهو أنت كده كده لازم تبطل ذنوب ياعويس وتعد تدعي ربنا لكن الموضوع إلى أحنا بنتكلم فيه دة ملوش دعوة بالمعاصي والذنوب 
 
عويس : أمال لية دعوة باية يعنى 
 
أستاذ محمد : له دعوة  بطريقة تعاملنا مع البيئة إلى أحنا عايشين فيها

عويس : أنت رجعت تانى لكلام " التلفزيون " بيئة أيه ياأستاذ  فهمني براحه 
 
أستاذ محمد : يعنى أحنا ياعويس بنعد نقطع الشجر ونبطل نزرع الأرض عشان نبني بيوت عليها مش كده مش أنت بطلت تزرع وبنيت بيت علي الأرض بتاعتك

عويس : أمال يعنى اتجوز فين يا أستاذ 
 
أستاذ محمد : كمان ياعويس أنا كل لما بعدي من قدام بيتك باليل وأنا راجع من الشغل أشوف نور البيت كلة عندك مولع وكمان صوت التسجيل وأنت بتكون نايم 
 
عويس : أيوه سعات بسيب النور مولع بكسل أطفيه هو والتسجيل وبعدين منا بدفع فواتير الكهرباء فى مواعيدها 
 
أستاذ محمد : وكمان ياعويس كل يوم أشوفك ماسك خرطوم الميه وعمال ترش قدام بيتك  كأن فى ماسورة  ضاربة 
 
عويس : أيوه مهو عشان الحر ونضافة وبرده أنا بدفع فواتير الميه
استاذ محمد : كمان ياعويس أنت بترمي الزبالة بتاعتك فى الخرابة إلى فى ظهر بيتك لحد ما عملت جبل زبالة 
 
عويس : مهو صندوق الزبالة بعيد وبعدين كل الحجات إلى أنت قولتها دى أيه علاقاتها بالموضوع إلى أحنا بنتكلم فيه 
 
أستاذ محمد : دة هو دة الموضوع ياعويس أحنا بنستخدم كل حاجة غلط يعني الشجر إلى أحنا بنقطعة والزرع إلى مش بنزرعة ونبنى بيوت على الارض مكانة دة بيساعدنا لانه بيقلل نسبة ثانى أكسيد الكربون ويزود نسبة الاكسجين لما أنت بتسيب النور والع طول اليل دة بيستخدم طاقة أكتر نولد بيها كهرباء ودة بيزود نسبة ثانى أكسيد الكربون ولما أنت بتسيب الزبالة تتخمر دى بردة بطلع غازات كتير ضارة 
 
عويس : كل دة بيحصل من الحجات إلى أنا بعملها وبعدين أيه ثانى أكسيد الكربون دة ولما بيزيد بيعمل أيه يعنى 
 
أستاذ محمد : كويس أنك أخت بالك من ثانى اكسيد الكربون دة لان دة هو سبب معظم المشاكل دة بقا ياسيدى نوع من الغازات الى كترتها بيضرنا 
 
عويس : أزي يعنى 
 
أستاذ محمد : الغاز دة لما بيزيد بيحبس أشعة الشمس إلى بنزل علي الأرض يعني يخليها تنزل وما تطلعش وبكدة درجة الحرارة تزيد والجليد يذوب ومنسوب البحر يزيد ولو دة حصل فى أجراء كتير حتغرق 
 
عويس : كل دة يااااااااااااااااااة ياأستاذ أحنا وحشين أوووي كده أحنا إلى عملنا كل دة فى نفسينا بس تعرف ياأستاذ 

 
أستاذ محمد : نعم ياعويس 

عويس : عمر ماحد فهمنا ،عمر ماحد قلنا ، طول عمرهم بيكلمونا من برج عالي ، بيتكلموا كأنهم بيدو محاضرة في الجامعه ، عمر ماحد فيهم كان بيتكلم بطريقة يفهم بيها الراجل البسيط إلى زى حالتي أن فى خطر ، وأنا إلى كونت مفكر أن كل إلى بيحصل دة غضب من ربنا 

 كتبت في 11 نوفمبر 2010

فازت هذه التدوينة في مسابقة مدونون ضد التغيرات المناخية التي نظمتها مكتبة الإسكندرية بالتعاون مع مؤسسة فريدريش ناومان الالمانية

http://www.fnst-egypt.org/Blogging-Project-Ends-with-a-Big-Party-Arabic.html